فشخرتنا يافشخرتنا ......

عزيزي المستمع
بصبح عليك
عزيزي جيت أقولك
الله يرحم والديك
الله يرحم أيام زمان
أيام ماكان الإنسان
أيام ماكان في أمان
أيام ماكانش في فرمان
يجيلك يغمك يطلع عنيك
********************
ياتري فاكر ولا ناسي
لسه فاكر المراسي؟
يوم ماتقعد ع الكراسي
والدنيا رايقه والجو هادي
علي شط رايق ف حته شيك
أيام كانت مباركه
النعمه جاريه بين إيديك
********************
هتقولي إيه العلاقه!
بين المراسي ..والكراسي
وابويا وامي.. والزمان يافقيق??
هقولك كانت في زمان
ناس تقدر الإنسان
حكومه عاوزاك توصل للأمان
رئيس ودوله خيرها ليك
ولا نهب بقي ولا أيا كان
بس حاسب هقولك حاجه
كل ده بس ف الأحلام
********************
انت لا حاضر ولا ماضي
بس ذل ومهانه وحرمان
مهما طلعت أو نزلت
هتتعامل في بلدك
لامؤاخذه كأنك حيوان
تجري وتدوس ف الناس
وزي ما مكتوب ف الكراس
مسيرك برضه هتتداس
********************
وهو ده بقي زمن الفشخره
أصل احنا ف زمن الفشخره
غيري وغيرك افتري
ولا حد بيقوله انت فين
يافشخرتنا يافشخرتنا
فشخرتنا تسرح بيك
رئيسنا بس هو الديك
والحاشيه برابر معاليك
وإحنا الحبوب نتاكل
واصرخ مهما تصرخ
ولا حد يسأل فيك
********************
يافشخرتنا بإسم مصر
طب فهموني حاجه مهمه
إزاي أم الدنيا هي
وهي ملطشه العصر
هي سجاد القصر
هي السحابه السوده
هي أتوبيسات كركوبه
هي ناس مغلوبه
هي مهانه مكتوبه
هي أملاك منهوبه
هي هزيمه النصر
حماكي الله يامصر
********************
فشخرتنا مش بس محليه
فشخرتنا عرب والعرب هفيه
عاوز اغنيلكم أغنيه
توجع راسكو شويه
أصل انا صوتي حق
وصوت الحق وحش
اسمع مني الطرب
أه ياعرب أه ياعرب
مافيكو شامخ
كله بيتضرب
والفاعل هرب
********************
ماسكين ف بعص ليه
رميتو ال حياتكو بيه
وحبيتوا ال دماركو فيه
وكل يوم طالعين ب قمه
من بره باين حماس وهمه
ومن جواكو أصلا من بعض
قرفاااااااااااااااانين
********************
اصل انتم في الحياه مساجين
ف سجن الفلوس
سجن النفوذ
سجن النفوس
سجن المناصب
سجن الغرور
صدق اللي قال
من بره هالله هالله
ومن جوه ....اسكت ياموكوس
********************
شفت فيكو العجب
شعب غزه بينضرب
والروح من اخوك بتسلب
والناس فعلا زعلانين
بس ليه ياتري
عشان الأهلي إتغلب
شوف العجب
هنا حفله للطرب
وهناك طفل أبوه مات
وامه واخواته وبيته اتخرب
واحنا قاعدين نفكر
مين هيمسك الزمالك
إللي دايما يتغلب
********************
من زمان والغرب سايقكو
دخلو العراق وغزه
ولبنان ومن قبلها الشيشان
ولا حد قال إتحدوا ياعرب
شوف العجب
علي جلدكو اترسمت حروف
توصف كل علامات الهوان
والرسم عمره مايتمسح
إلا لو فيكو الخسيس إتضرب
والعيب عليكو ياعرب
وفشخرتنا يافشخرتنا
احنا العرب ياولاد حارتنا
نحكي تاني علي خيبتنا
ولا كفايه ياعرب
فشخرتنا يافشخرتنا